Fylkesveg 2532 må byggjast opp att etter to ras i Lia i Sør-Fron i august.
Anders Fosse Skjåk
Entreprenøren som arbeider for fylkeskommunen skal fjerne massar og fjerne fjell for å få bygd vegen opp att etter uveret «Hans».
Hardt råka
Fylkesveg 2532 vart hardt råka av flaum og ras under ekstremvêret i august. Mellom anna gjekk det to store ras i Lia i Sør-Fron og vegen vart stengd.
Fylkeskommunen starta arbeidet med å byggje opp att vegen med ein gong, men arbeidet tek tid. Etter å ha vore open for trafikk i eitt felt i korte periodar, blir vegen no heilt stengd frå 20. november til 15. desember.
Ny fylling
- Vi skal skifte ut jordmassar og fjell for å byggje opp ei god fylling som vegen skal liggje på. Vi skal og skifte to stikkrenner der, seier byggjeleiar Anders Fosse Skjåk i Innlandet fylkeskommune.
- Det er ikkje mogleg å ha trafikk gjennom anleggsområdet mens anleggsarbeidet skjer. Vi skal og gjennomføre andre tiltak, som steinplastring av bekkeløpet inn mot stikkrennene, forklarer Skjåk.
Omkøyringsvegar
Punktet der Vestsidevegen blir stengd, ligg i Åbakkdalen, om lag to kilometer sør for Falebakken-krysset.
Trafikantane må rekne med ein lengre omkøyringsveg, ettersom Randklev bru på den same fylkesvegen også er stengd på grunn av skader etter uveret i august.
Det går an å køyre nordover på fylkesveg 2532 til Hundorp og vidare sørover på fylkesveg 2522 til Frya. Sør for Åbakkdalen kan ein køyre Vestsidevegen til Fåvang.