Arbeidet med å førebu asfalteringa på Rogndokkvegen er i gang. Leif Inge Størdal

Strekningen mellom Holdalsfoss og Tuv skal asfalterast, men fyrst må fylkeskommunen gjere omfattande arbeid med grøfter, stikkrenner og dårlege masser i vegen.

Få vatnet unna

For at nylagd asfalt skal vare i mange år, er det viktig å gjere tiltak som kan halde vatnet mest mogleg unna vegen. 

Entreprenøren som arbeider for fylkeskommunen er difor i gang med tiltak som skal sørge for at det skjer.

- Vi skal reinske opp i grøfter og fjerne torvkantar langs vegen. Nokre stikkrenner må skiftast, og somme plassar må vi forsterke vegen før asfaltering, seier byggjeleiar Håvard Ødegård i Innlandet fylkeskommune.

Dette arbeidet vil vare fram til midten av juli. Etter ferien skal vegen djupstabiliserast med pukk, før han blir asfaltert.

Stengd på dagtid

Frå måndag 26. mai til midten av juli vil strekningen bli stengd i periodar mellom klokka 07 og 19 måndag til og med torsdag. I helgene blir vegen open.

- Vegen blir stengd når entreprenøren treng å gjere det, på grunn av arbeidet, for eksempel når vegen skal gravast over. Stenginga blir varsla med skilt i begge endar. Folk som bur langs vegen skal kunne kome seg inn og ut av eigedomen og entreprenøren har dialog med transportørane, sik at skuleelevane kjem seg til og frå skulen, seier Ødegård.

Trafikantane kan køyre fylkesveg 51 og fylkesveg 2490 om Velta når Rogndokkvegen er stengd.  

Det er Brødrene Dokken AS som skal gjere arbeidet for fylkeskommunen, med Beitostølen anlegg AS som underentreprenør.