Det blir gjort grundig forarbeid før Køllstadvegen i Øystre Slidre skal asfalterast. Anders Fosse Skjåk

Anleggsarbeidet starta i fjor sommar og blir ferdig i haust.

Tiltak før asfaltering

Arbeidet går ut på å gjere godt grunnarbeid på vegen, for at han skal halde seg i god stand lengre, etter asfaltering.

Fylkeskommunen skal skifte fleire stikkrenner på vegen gjennom Køllstadbygda i Øystre Slidre. Dårlege massar blir skifta ut på dei svakaste punkta på fylkesvegen.

Nokre skadar som vegen fekk under ekstremveret «Hans» i august i 2023, skal reparerast.

Det er driftsentreprenøren, Brødrene Dokken AS, som gjer arbeidet for fylkeskommunen.

Stengd på nokre punkt

Strekningen som skal asfalterast, byrjar i krysset med fylkesveg 51 og går forbi Melbybråten, opp mot skiferbruddet.

- Vegen blir stengd på nokre punkt i samband med arbeidet, men omkøyringsvegen er skilta. Vi planlegg arbeidet slik at skolebussen skal kome fram gjennom anleggsområdet, fortel byggjeleiar Anders Skjåk i Innlandet fylkeskommune.

Arbeidet som blir utført no, skal vere ferdig til fellesferien. Vegen skal asfalterast i haust.

Fylkeskommunen har sett av 15 millionar kroner til vedlikehaldsarbeidet på Køllstadvegen.