Det er dårleg sikt framfor hjullastaren som brukast til å frese opp fylkesveg 51 over Valdresflye no. Odd Arne Rødningen/Beitostølen Anlegg

Verprognosane endrar seg stadig, og det er vanskeleg å seie når vegen kan opnast.

Vind og snøfokk

- I fleire dagar har det vore uver i fjellet. Kraftig vind, nysnø og snøfokk gjer forholda krevjande. Prognosen for palmehelga ser ikkje lovande ut no, seier byggjeleiar Håvard Ødegård i Innlandet fylkeskommune.

Driftsentreprenøren til fylkeskommunen har to hjullastarar med fres i sving for å opne den vinterstengde vegen mellom Bygdin og Maurvangen. 

Uveret gjer at strekningar som har vorte freste opp, driv att, og brøytemannskapa brukar mykje tid på fresing. Dette forseinkar framdrifta i stor grad.

Sjekk vegmeldingane

- Vi vil gjere ei ny vurdering av tilhøva på fredag, ut frå framdrifta til entreprenøren og oppdaterte verprognosar, for å finne ut når det kan bli mogleg å opne vegen etter vinterstenging, seier Ødegård. 

Når fylkesveg 51 har vorte opna mellom Bygdin i Øystre Slidre og Maurvangen i Vågå, blir han nattestengd mellom klokka 20 og 08 alle dagane i veka den fyrste tida.

Trafikantane kan finne oppdatert informasjon om opne og stengde riks- og fylkesvegar på www.vegvesen.no/trafikk eller ved å ringe vegtrafikksentralen på nummeret 175.