Lom er ein av kommunane som kan søke om midlar til omstilling og arbeidsplassutvikling. Innlandet fylkeskommune/Leila Øvreseth

Fylkesutvalet vedtok tysdag å opprette ei støtteordning for dei fem kommunane som mista den vidaregåande skulen sin eller sin skulestad som følgje av ny skulestruktur frå 2025.

Dei fem kommunane er Dovre, Lom, Nordre Land, Sør-Odal og Åsnes. Ramma for ordninga i 2025 er 10 millionar kroner.

Fremje omstilling

Prosjektene dei fem kommunane kan søke om midlar til, er prosjekt som fremjar omstilling og utvikling av arbeidsplassar.

Kor store konsekvensar skulenedlegginga har for kommunen og den lokale arbeidsmarknaden, er òg ein del av vurderinga når fylkeskommunen skal tildele midlar. Det maksimale tilskotet per kommune er 2 millionar kroner.

Pengane kan ikkje brukast til ordinære kommunale driftsoppgåver eller aktivitetar knytte til vidaregåande skule.

For å komme fram til korleis støtteordninga bør innrettast, har fylkeskommunen hatt arbeidsverksstad med deltakarar frå ni kommunar.

Søknadsfristen er 1. desember 2025.

Fleire alternative forslag

Ifølgje innstillinga til fylkeskommunedirektør Tron Bamrud skulle tilskotet kunne aukast med 500 000 kroner ved eit samarbeid med nabokommunar.

Joakim Ekseth (H) foreslo på vegner av Høgre, Ap og MDG å stryke dette fordi ordninga var tenkt berre for dei ramma kommunane.

Truls Gihlemoen (Frp) fremja òg eit alternativt forslag om at kommunane skulle kunne bruke midlane fritt. Dette forslaget fekk ikkje fleirtal.

Svein Ørsnes (R) fremja eit forslag om å auke ramma til 20 millionar kroner. Heller ikkje dette forslaget fekk fleirtal.

Politisk behandling

Bamruds innstilling vart vedtatt med endringa fremja av Joakim Ekseth.

Les sakspapira PS 87/2025